A m tismin !
Jjip tegzem, ulac tejlalt
Tamuɣli-k ad tt-teṭṭafar
Wali taksumt tamellalt
Tegrurez teglult ḥekkeṛ
Tamessaḍt telha d tafat
Siked kan akka i d aḍar
Mi t-tesserseḍ ɣef tuyat
Llhi-d imiren d leqrar
A m tismin !
Ur d-cligeɣ di tmessaḍin !
Ẓer kan akka i d amzur
D aleqqaq, d afilali
Sself-as imi t-tesɛiḍ d amur
Ad twaliḍ amek iɣelli
Ɣef tmeccacin-iw d-ibedden
Tid ur tezgil tmuɣli
Am keččini am medden
Axi-tent-in fell-asent ali
A m tismin !
Ur d-cliɛeɣ di tmecccin !
Muqel-iyi-d ɣer idmaren-iw
Wali akka i tibbucin
Xedmeɣ yis-sent aɛezziw
Ttasment seg-i teqcicin
I yebɣun deg-sent teṭṭḍeḍ
Ad yezg ɣer-k laẓ d amqennin
Sani i yak yehwa tṛuḥeḍ
Tiẓeṭ nnsent tedda d aɛwin
A m tismin !
Ur ceṭṭneɣ di tebbucin !
Wali di ṣṣifa n wudem
Ma ur cbiḥeɣ ɣas ini-t-id
Ɣef tcenfirin yura yisem
Ara ireqq deg allen-iw wali-t
Wissen m’ur tefhim ara asirem
D kra akk i d-nettnehhit
Ɣer ddaw wakal ɣas kcem
Yeffeɣ-ik umur di ddunit
A m tismin !
Ur nḥerwaɣ di tqemmucin !
A m tismin !
Ɣas tafekka temleḥ, teččur
Ur nkiṛeɣ ayen yellan d zzin
Maca kra din d leɣrur
Iɛecceq n win ur nessin
Allaɣ ilem, ul d lbuṛ
Akka igant kra n teḥdayin
Wigi mačči d yir lehduṛ
Aṭas i ssneɣ di tlawin
A m tismin !
Tidet, i yi-yerḥan d tayri-m !
A m tismin !
sɣur Saïd CHEMAKH
Lpari, Furar 2002.
